Sveitarfélög á Suðurnesjum hafa áhyggjur af málum lögreglunnar

Stjórn Samands sveitarfélaga á Suðurnesjum hefur bæst í hóp fjölmargra aðila á Suðurnesjum sem lýsa yfir þungum áhyggjum vegna fjárhagsvanda sem blasir við embætti Lögreglustjórans á Suðurnesjum.

Á fundi stjórnar sambandsins í dag var samþykkt bókun þar sem minnt er á að þegar sameining lögregluembættanna á Suðurnesjum var kynnt átti hún að styrkja og efla löggæslu á Suðurnesjum. Hins vegar hafi fækkað verulega í lögregluliðinu og útlit sé fyrir enn frekari niðurskurð ef ekkert verði að gert til að treysta rekstrargrundvöll embættisins.

,,Stjórn SSS vekur enn á ný athygli á mikilli aukningu á umsvifum í kringum flugstarfsemi á Keflavíkurflugvelli og öryggisgæslu ásamt örri fjölgun íbúa á svæðinu. Þá er einnig vísað til ályktunar aðalfundar SSS frá 10. nóvember sl. um löggæslumál þar sem m.a. er vakin athygli á rekstrargrundvelli og húsnæðismálum embættis lögreglustjórans á Suðurnesjum.," segir í bókuninni.

Þá segist sambandið treysta því að stjórnvöld bregðist við þessum mikla vanda og eyði þeirri óvissu sem löggæslan á Suðurnesjum búi við í dag.