Útflutningsverðmæti sjávarafurða eykst

Útflutningsverðmæti áls og sjávarafurða hefur aukist um allt að tuttugu milljarða vegna veikingar krónunnar. Hækkanir á erlendum mörkuðum auka verðmætið enn frekar.

Útflutningur á sjávarafurðum og áli var um 68 prósent af heildarútflutning íslendinga á síðasta ári. Þá nam verðmæti útfluttra sjávarafurða um 128 milljörðum króna og áls um 80 milljörðum.

Veiking krónunnar hefur þær jákvæðu afleiðingar að verðmæti útflutningsvara eykst. Á fyrstu mánuðum þessa árs hefur meðaltal gengisvísitölunnar verið um 129 stig sem er 8,5 prósent gengislækkun miðað við meðaltalið allt árið í fyrra.

Á ársgrundvelli hefur verðmæti sjávarafurða því aukist um allt að 12 milljarða sé horft til útflutnings á síðasta ári. Á sama tíma hefur verð á sjávarafurðum, einkum þorski, farið hækkandi á erlendum mörkuðum.

Í fyrra nam hækkunin 9 prósentum sem þýðir tekjuaukning upp á rúma 10 milljarða.

Samspil gengisþróunar og verðhækkana á erlendum mörkuðum hefur því aukið verðmæti sjávarafurða um rúma 20 milljarða miðað við gefnar forsendur.

Það sama gildir um álútflutning. Með veikingu krónunna hefur útflutningsverðmæti áls aukist um tæpa 7 milljarða miðað heildarútflutning á síðasta ári. Fyrir liggur að álútflutningur muni aukast á næstu árum en samkvæmt spá greingadeildar Kaupþings fer útflutningurinn í 135 milljarða á þessu ári og í 140 milljarða á því næsta.

Frá áramótum hefur álverð á heimsmarkaði hækkað um allt að 34 prósent og er nú yfir þrjú þúsund dollarar á tonnið. Þessar hækkanir skila sér einnig í vasa Landsvirkjunar en raforkuverð til álvera tekur mið af heimsmarkaðsverði á áli.