Norðurálsmenn halda áfram leikriti

Bergur Sigurðsson, framkvæmdastjóri Landverndar, segir forsvarsmenn Norðuráls hafa haldið áfram leikriti í morgun í tengslum við byggingu álvers í Helguvík til þess að láta líta svo út að þeir séu búnir að landa málinu. Hans segir samtökin bíða eftir úrskurði umhverfisráðuneytisins varðandi kæru samtakanna vegna álversframkvæmdanna.

Fréttir bárust af því í morgun að forsvarsmenn Norðuráls hefðu hafið framkvæmdir við álver í Helguvík eftir að hafa fengið í hendur byggingar- og framkvæmdaleyfi frá bæjarstjórnum Garðs og Reykjanesbæjar. Framkvæmdirnar snúa fyrst og fremst að því að girða svæðið og leggja vegi að því en stefnt er að því að byrja að byggja kerskála álversins um leið og semst við verktaka.

Þarf að breyta skipulagi í sjö bæjarfélögum

Bergur Sigurðsson, framkvæmdastjóri Landverndar, segir að það komi honum ekki á óvart að Norðurálsmenn séu byrjaðir að moka. Menn hætti ekki í miðju leikriti. „Þetta er leikrit sem þeir halda áfram í þeim tilgangi að láta líta út fyrir að það sé búið að landa málinu," segir Bergur.

Það sé langt frá því að vera satt. „Þeir eru til að mynda ekki komnir með losunarheimildir og til þess að verkefnið nái fram að ganga þarf að breyta skipulagi í sjö sveitarfélögum sem ekki njóta góðs af álverinu sem slíku," segir Bergur. Það séu Ölfus, Kópavogur, Reykjavík, Hafnarfjörður, Grindavík, Vogar og Garðabær en um þessi sveitarfélög munu raflínur liggja frá orkuverum Orkuveitu Reykjavíkur.

Bergur minnir á andstöðu Hafnfirðinga við raflínur í sveitarfélaginu í tengslum við kosningar um stækkun álvers Alcan í Straumsvík í fyrra. „Þeir vildu ekki raflínurnar fyrir álverið sitt, skyldu gera það fyrir álverið í Helguvík," spyr Bergur.

Kæra ákvörðun sem fólgin sé í áliti Skipulagsstofnunar

Aðspurður segir Bergur að Landvernd muni bíða eftir úrskurði umhverfisráðuneytisins um kæru sem samtökin lögðu fram vegna framkvæmdarinnar. Bergur bendir á að ekki megi gefa út framkvæmdaleyfi fyrir matsskyldum framkvæmdum nema álit Skipulagsstofnunar um umhverfisáhrif liggi fyrir. Skipulagsstofnun hafi gefið út sitt álit en Landvernd kæri ákvörðun sem fólgin sé í álitinu.

Norðurál heldur því fram álit Skipulagsstofnunar sæti ekki kæru til ráðherra og þar sem byggingarleyfi byggi á áliti Skipulagsstofnunar „verður ekki séð að umrædd kæra hafi nein áhrif á útgáfu byggingarleyfis og hefur Norðurál því haldið áfram vinnu við undirbúning verkefnisins samkvæmt áætlun," sagði í tilkynningu félagsins í gær.

Bergur bendir hins vegar á að Landvernd kæri ákvörðun sem fólgin sé í áliti Skipulagsstofnunar, það er að Skipulagsstofnun nýti ekki heimildir sínar í lögum til þess að gera heildarmat á álversframkvæmdunum. „Landvernd krefst þess að álit Skipualgsstofnunar verði ógilt og að fram fari lögformlegt umhverfismat á framvæmdunum í heild sinni, álveri og flæðigryfju, háspennulínum, virkjunum og hafnarframkvæmdum," segir í kæru Landverndar.

Bergur bendir á að ráðherra beri í úrskurði sínum að taka afstöðu til kröfu samtakanna.