Shannon fundin eftir 24 daga leit

Shannon Matthews, níu ára gömul skólastelpa frá Dewsbury í Yorkshire á Englandi er fundin, heil á húfi. Shannon hefur verið týnd í tuttugu og fjóra daga en síðast spurðist til hennar þegar hún var á leið heim úr skólanum.

Nú berast af því fregnir að hún hafi fundist í nágrannabænum Batley Carr, heil á húfi. Lögreglumenn gerðu árás á hús í bænum og brutust inn, að sögn sjónarvotta. stuttu síðar komu þeir út með stúlkuna.

Hvarf stúlkunnar hafði vakið mikla athygli á Englandi og hafði dagblað þar í landi boðið rúmar sjö milljónir króna í fundarlaun. Gríðarlegur fjöldi lögreglumanna hefur leitað stúlkunnar síðustu vikur og meðal annars farið inn á rúmlega 200 heimili á svæðinu.