Kósóvó-Serbar lögðu undir sig dómhús SÞ

Hundruð Kósóvó-Serba réðust inn í dómhús Sameinuðu þjóðanna í bænum Mitrovica í norðurhluta Kósóvó í dag og reistu þar við hún þjóðfána Serbíu í stað fána SÞ sem áður blakti þar. Samningamenn SÞ eiga nú í viðræðum við innrásarhópinn sem náði húsinu á sitt vald og stökkti varðmönnum SÞ á flótta. Atburðurinn tengist sjálfstæðisyfirlýsingu Kósóvó 17. febrúar en Serbar og Kósóvó-Serbar viðurkenna ekki það sjálfstæði.

Serbar hafa staðið fyrir mótmælum utan við dómhúsið í nokkrar vikur og meðal annars hindrað að albanskir starfsmenn dómstólsins komist til vinnu sinnar yfir brú yfir ána Ibar sem skiptir Mitrovica í tvo hluta, serbneskan og albanskan. Ljóst er að hluti hópsins sem tók dómhúsið á sitt vald er fyrrverandi starfsfólk dómstólsins sem missti vinnuna árið 1999 þegar stríðinu í Kósóvó lauk og SÞ settust við stjórnvölinn þar. BBC greindi frá.