Segir Baugsmál hafa molnað í höndum skattayfirvalda

„Þetta mál hefur molnað niður í höndum skattyfirvalda og núna þarf að endurgreiða okkur rúmlega 75 milljónir af þeim 142 sem okkur var gert að greiða. Þá spyr maður sig hvort ekki hafi verið full hátt reitt til höggs af þeirra hálfu?," segir Hreinn Loftsson stjórnarmaður í Baugi og lögmaður félagsins.

Ríkisskattstjóra hefur verið gert að endurgreiða Baugi Group rúmlega 75 milljónir króna vegna oftekinna opinberra gjalda samkvæmt ákvörðun yfirskattanefndar.

Hreinn segir að af þeim átta atriðum sem stóðu eftir standi nú einungis þrjú atriði eftir. „Tvö af þeim eru minniháttar og eitt atriðið snýr að tæknilegri útfærslu á sameiningu félaga árið 1998 sem urðu að Baugi. Það er alltaf erfitt að meta óskráð fyrirtæki og þetta atriði er til skoðunar og fer jafnvel fyrir dómstóla."

Hreinn segir að ekki síst sé athyglisvert að málið hafi verið blásið mikið upp í fjölmiðlum og meðal annars hafi valdamiklir stjórnmálamenn talað um að þarna væri stærsta skattsvikamál sögunnar í uppsiglingu. „Þetta er síðan niðurstaðan.“

Hann bendir á að rannsóknin hafi kostað gríðarlega fjármuni en það sem eftir standi séu atriði sem lúti að starfstengdum greiðslum nokkurra yfirmanna félagsins á árunum 1998-2002. „Yfirskattanefnd hefur hinsvegar komist að þeirri niðurstöðu að þessar greiðslur voru hlunnindi en ekki staðgreiðsluskyldar á þessum tíma," segir Hreinn.

Aðspurður um hvaða áhrif þessi staða hafi á hugsanlegt framhald málsins gagnvart þeim einstaklingum sem í hlut eiga segir Hreinn: „Það veikir mjög stöðu yfirvalda að ætla að koma með einhverja ákærur á hendur þessum einstaklingum þar sem umræddar greiðslur voru ekki staðgreiðsluskyldar þegar þeir fengu þær. Hugsanlegur refsigrundvöllur er því mjög óljós."