Búið að gera við um helming Nissan Navara bíla

Öryggisbúnaður í rúmlega tvö hundruð Nissan Navara pallbílum hér á landi hefur verið endurbættur eftir að bíllinn fékk falleinkunn í árekstraprófun. Í endurteknum prófunum eftir breytingar fær bíllinn hins vegar mun betri einkunn.

Í árekstraprófun evrópska bifreiðaeftirlitsins Euro NCAP sem fram fór í síðasta mánuði fékk Nissan Navara svo slæma útkomu að bíllinn var beinlínis talinn lífshættulegur. Við árekstur á rúmlega 60 kílómetra hraða brotnaði burðargrind í bílnum og brot úr henni gekk inn í fótrými ökumanns. Þá brugðust loftpúðar og beltastrekkjar of seint við með þeim afleiðingum að skynjarar í höfði ökumannsbrúðurnnar bentu til lífshættulegra áverka. Hlaut bíllinn einungis eina gegnumstrikaða stjörnu af fimm í prófinu.

Á heimasíðu Félags íslenskra bifreiðaeigenda kemur fram að framleiðendur bílsins hafi brugðist skjótt við og breytt öryggishugbúnaði bílsins. Í kjölfarið endurtók Euro NCAP árekstrarprófið og fékk bíllinn þá þrjár stjörnur af fimm.

Umboðsaðili Nissan Navarra hér á landi, Ingvar Helgason hf., innkallaði um 420 Nissan Navara bifreiðar til hægt væri að endurstilla öryggishugbúnað.

Loftur Ágústsson, markaðsstjóri hjá Ingvari Helgasyni, sagði í samtali við fréttastofu að nú þegar væru búið að endurbæta um 200 bifreiðar. Tveir þjónustubílar á vegum umboðsins væru nú að keyra hringinn í kringum landið til að aðstoða viðskiptavini á landsbyggðinni. Vonast hann til þess að búið verði að endurbæta alla bíla eftir tvær til þrjár vikur.