Inflúensan sögð væg og seint á ferðinni

Inflúensan hefur að því er virðist verið fremur væg það sem af þessum vetri og kom tiltölulega seint. Þetta kemur fram í nýjum Farsóttarfréttum Landslæknisembættisins.

Vísað er í upplýsingar frá Læknavaktinni og frá veirufræðideild Háskólans. Inflúensan hefur greinst nokkuð reglulega frá áramótum en virðist ekki hafa haft marktæk áhrif í samfélaginu fyrr en í lok janúar. Segir í Farsóttarfréttum að enn sé of snemmt að fullyrða um að inflúensan sé í rénun.

Inflúensufaraldurinn í ár hefur einkennst af því að sjúklingar eru fremur ungir, en meðalaldur þeirra er um 25 ár. Um 40 prósent sjúklinganna eru yngri en 10 ára en einungis 14 prósent eru 60 ára og eldri.

„Nærtæk skýring er sú að þar sem H1N1-stofninn og inflúensa B eru yfirleitt sjaldgæfari en H3N2, er líklegt að ungt fólk sé næmara fyrir H1N1 en þeir sem eldri eru. Önnur hugsanleg skýring er að fleiri en venjulega í aldurshópnum 60 ára og eldri hafi látið bólusetja sig gegn inflúensu, eins og mælt er með," segir í frétt Landlæknisembættisins.