Settu upp stíflu í anddyri Landsvirkjunar

Nokkrir krakkar settu upp stíflu við inngang Landsvirkjunar í morgun. Tilefnið var alþjóðlegur baráttudagur fyrir ár og fljót í heiminum. Krakkarnir voru prúðir og kurteisir en hurfu fljótt á brott þar sem þau þurftu að mæta í skóla.

Lögreglan mætti þó á svæðið en höfðu engin afskipti af krökkunum. „Þessi stífla hélt nú ekki vatni. Þetta var meira svona lítill fartálmi sem öllum var frjálst að klofa yfir," segir Þorsteinn Hilmarsson upplýsingafulltrúi Landsvirkjunar.

Hann segir krakkana hafa hagað sér vel og þau hafi stoppað stutt við. „Ég bauð þeim reyndar að koma inn en þau vildu það ekki þar sem skólinn var að hefjast. Þau höfðu mikinn áhuga á þessum málum og við áttum gott spjall."