Játar á sig fjársvik í Tryggingarstofnunarmáli

Fjölmennasta þingfesting í sögu Héraðsdóms Reykjavíkur var í morgun í máli ríkislögreglustjóra á hendur 20 manns sem ákærðir eru í tengslum við fjársvik innan Trygginarstofununar ríkisins sem talin eru nema um 76 milljónum króna.

Samkvæmt ákæru Ríkislögreglustjóra framdi konan brotin með því að útbúa 781 tilhæfulausa kvittun fyrir útborgunum og blekkja gjaldkera Tryggingastofnunar til að greiða að tilefnislausu úr sjóðum stofnunarinnar á grundvelli þessara reikninga hátt í 76 milljónir króna. Ákæran gegn konunni er í 22 liðum.

Nítján aðrir einstaklingar, karlar og konur á aldrinum 20 til 54 ára, eru ákærðir fyrir hylmingu en til vara peningaþvætti, með því að veita viðtöku á bankareikninga í þeirra vörslu, halda og ráðstafa fé sem var ávinningur af brotum þjónustufulltrúans þrátt fyrir að vera ljóst að um illa fengið fé var að ræða.

Fjórir einstaklingar af þeim eru svo ákærðir fyrir hlutdeild í fjársvikum þjónustufulltrúans með því að fá samþykki frá 15 meðákærðu fyrir því að greiðslur sem sviknar voru út úr Tryggingastofnun ríkisins yrðu lagðar inn á bankareikning þeirra.

Það komust færri að en vildu inn í salinn enda tuttugu manns ákærðir í málinu. Sumir þeirra eru með sama verjandann og því voru sextán verjendur í salnum. Þetta er fjölmennasti hópur ákærða í sögu héraðsdóms.

Auk höfuðpaursins játuðu fjórir aðrir sakborningar sök í málinu að fullu. Fimm hinna ákærðu neituðu sök og tveir játuðu brot sín að hluta en neituðu öðru. Þrír þeirra ákærðu fóru fram á frest í málinu og fimm þeirra mættu ekki í fyrirtökuna.

Þinghaldi verður fram haldið þann 18. apríl en þá munu þeir sem ekki tjáðu sig í dag lýsa yfir sekt eða sakleysi. Það á einnig við um þá sem ekki mættu fyrir dómara í dag.

Stefnt er að því að aðalmeðferð í málinu fari fram um miðjan maí og sagði dómari í dag allar líkur á því að dómurinn verði fjölskipaður.