Lögreglumenn á Suðurnesjum funda enn

Nú stendur yfir fundur lögreglu- og tollgæslumanna á Suðurnesjum á Kaffi Duus í Reykjanesbæ. Boðað var til fundarins með félagsmönnum og stjórnmálamönnum af Suðurnesjum. Menn óttast uppsagnir vegna niðurskurðar.

Fundurinn er fjölmennur og þar ræða menn þá stöðu sem upp er komin vegna hugsanlegs niðurskurðar hjá embætti lögreglunnar á Suðurnesjum.

Guðbjörn Guðbjörnsson, formaður Tollvarðafélags Íslands, sagði í samtali við fréttastofu Sjónvarps nú í kvöld að það væri uggur í fólki. Það eina sem menn biðji er um er að ekki verði fækkað frekar hjá embættinu. „Við viljum ná sama fjölda og var árið 2006, því var lofað."