Hætt við mikla landfyllingu við Ánanaust

Hætt hefur verið við fyrirhugaða landfyllingu við Ánanaust og var sú ákvörðun tekin á fundi borgarráðs í morgun.

Fram kemur í bókun meirihluta borgarstjórnar í fundargerð að íbúar hafi mótmælt framkvæmdunum hraustlega en Samfylking, Vinstri græn og Framsóknarflokkur hafi sett landfyllinguna á aðalskipulag Reykjavíkur árið 2002.

,,Núverandi meirihluti hefur ekki í hyggju að ráðast í þá risavöxnu uppfyllingu heldur aðeins örlítið brot af henni, m.a. til að koma því efni sem mokað er upp úr grunni Tónlistar- og ráðstefnuhússins. Samráðsfundur hefur verið haldinn með íbúum á svæðinu og því samráði verður haldið áfram og öllum spurningum sem kunna að vakna svarað. Í millitíðinni verður efni úr grunni TRH sett í landfyllingar í Sundahöfn," segir í bókun meirihlutans.

Í bókun Dags B. Eggertssonar, fulltrúa Samfylkingarinnar í borgarráði, er niðurstöðunni fagnað enda sé hún í samræmi við andmæli, bókanir og fyrirvara Samfylkingarinnar allt frá upphafi þessa máls. ,,Í þeirri orrahríð sem staðið hefur undanfarið er ljóst að sjónarmið íbúa hafa orðið ofan á þótt enn sé nokkur óvissa um framhald málsins. Mikilvægt er að þeirri óvissu verði eytt."