Mávarnir fúlsuðu við eitrinu

57 mávar voru drepnir með eitri í tilraun sem framkvæmd var fyrir tilstilli Samtaka sveitarfélaga á höfuðborgarsvæðinu á liðnu ári. „Það sem kom einna mest á óvart við þessa tilraun var að einungis um helmingur beitunnar skilaði sofandi mávi," segir í frétt á heimasíðu Reykjavíkurborgar. Tilraunin var gerð í Þerney á Kollafirði og í Garðaholti á Álftanesi í júní 2007. Svæfa mátti allt að 600 pör en varp árið 2007 var lélegt, þriðja árið í röð. Skýrsla um málið hefur nú verið kynnt.

„Í Þerney var svefnlyf sett í 74 hreiður," segir í fréttinni. „28 mávar fundust sofandi á hreiðri, 5 sofandi í varpi, 5 sofandi í sjó. 16 beitur voru óétnar og 20 týndar. Í Garðaholti voru 42 hreiður beitt, 19 mávar fundust sofandi í hreiðri, enginn í varpi og 2 á sjó. 13 beitur voru óétnar og 8 týndar." Því skilaði aðeins helmingur beitunnar sofandi mávi, fjórðungur var ekki étinn og restin hvarf án þess að sofandi mávur hafi fundist og afdrif beitunnar því óljós.

Í skýrslunni segir að þetta háa hlutfall týndrar beitu sé áhyggjuefni og að verði svæfing reynd á ný þarf að endurskoða blöndun beitunnar til að lækka það. „Ekki ólíklegt að einhverjir mávanna hafi étið beituna án þess að sofna eða drukkna og jafnvel ælt henni upp hálfmeltri, " segir í skýrslunni.

Í skýrslunni kemur einnig fram að helsti kostur svæfingar fram yfir skotveiðar sé að meiri líkur séu á því að þannig sé hægt að minnka varp verulega með einu áhlaupi. Helsti ókostur svæfingar felst hins vegar í hættu á að friðaðar tegundir komist í beituna.