Dæmdur fyrir að hrinda konu í Melabúðinni

Héraðsdómur Reykjavíkur hefur dæmt karlmann í 30 daga fangelsi fyrir að hafa ráðist á konu í Melabúðinni og hrint henni þannig að hún féll aftur fyrir sig á gólf verslunarinnar og hlaut meðal annars heilahristing og taugaáfall.

Eftir því sem fram kemur í dómi kom til orðaskipta milli fólksins inni í búðinni. Var það eftir að konan hafði slegið á vélarhlíf bíls sem maðurinn var á en konan bar að hann hefði stigið á bensíngjöfina þegar hún hefði gengið yfir götuna við verslunina og henni brugðið við það.

Maðurinn neitaði sök en út frá framburði vitna og upptöku úr öryggismyndavél taldi dómurinn að fram væri komin sönnun fyrir því að maðurinn hefði ráðist á konuna.