Útflutningur og einkaneysla drifu áfram hagvöxt í fyrra

Hagvöxtur á landinu reyndist 3,8 prósent í fyrra samkvæmt nýjum tölum Hagstofunnar um landsframleiðslu. Þar segir að landsframleiðslan hafi numið tæplega 1280 milljörðum og jókst hún um 3,8 prósent sem fyrr segir. Til samanburðar var hagvöxtur 4,4 prósent árið 2006 en vel yfir sjö prósent árin 2004 og 2005.  

Hagvöxt á síðasta ári má öðru fremur rekja til verulegs vaxtar útflutnings og aukningar einkaneyslu. Á sama tíma dróst fjárfesting saman og einnig vöruinnflutningur. Þessi þróun er allt önnur en á undanförnum fjórum árum þegar hagvöxtur var drifinn áfram af einkaneyslu og fjárfestingu segir Hagstofan.

Bent er á í samantekt Hagstofunnar að til langs tíma litið hafi vöxtur einkaneyslu að mestu haldist í hendur við vöxt landsframleiðslu. Á árinu 2007 var einkaneysla 85 prósentum meiri en hún var á árinu 1990 en á sama tíma hefur landsframleiðsla vaxið um 72 prósent. Mannfjöldinn jókst á sama tíma um rúmlega 22 prósent. Einkaneysla á mann hefur því aukist um 52 prósent en landsframleiðsla um 41 prósent.

Tölur Hagstofunnar sýna enn fremur að laun- og fjármagnstekjur frá útlöndum jukust meira en nam aukningu launa- og fjármagnsgjalda til útlanda. Þessi aukning og óbreytt viðskiptakjör leiddu til þess að þjóðartekjur jukust á árinu 2007 mun meira en landsframleiðslan eða um 6,7 prósent samanborið við 1,6 prósenta vöxt árið áður.