Um 1600 einstæðir foreldrar leigja en fá ekki húsaleigubætur

Um sextán hundruð einstæðir foreldar á höfuðborgarsvæðinu áttu hvorki fasteign né fengu húsaleigubætur í fyrra og ekki liggja fyrir upplýsingar um búsetuaðstæður þeirra. Þetta kemur fram í svari Jóhönnu Sigurðardóttur við fyrirspurn Hönnu Birnu Jóhannsdóttur, varaþingmanns Frjálslynda flokksins.

Hanna Birna spurði hvort vitað væri hversu margir einstæðir foreldrar á höfuðborgarsvæðinu byggju í leiguhúsnæði og eigin húsnæði. Samkvæmt tölum ríkisskattstjóra áttu tæplega 4600 af þeim tæplega átta þúsund einstæðu foreldrum sem töldu fram til skatts í fyrra eigin fasteign.

Um 3400 áttu ekki fasteign en um 1600 manns fengu húsaleigubætur í desember í fyrra, eða um fimmtungur þeirra einstæðu foreldra sem töldu fram á höfuðborgarsvæðinu og um helmingur þeirra sem ekki áttu eigin fasteign.

Ekki eru hins vegar fyrirliggjandi upplýsingar um búsetuaðstæður annarra einstæðra foreldra og fjölskyldna þeirra, þ.e. þeirra tæplega 1.600 einstæðu foreldra sem hvorki áttu fasteign né fengu húsaleigubætur.