Telja bráðabirgðaflugstöð skynsamlegasta kostinn

Það er óþolandi að flug fái ekki að þróast á Reykjavíkurflugvellli eins og það ætti að gera, sagði Kristján L. Möller samgönguráðherra á Alþingi dag. Hann upplýsti jafnframt að hann hefði fundað með framkvæmdastjóra Flugfélags Íslands og borgarstjóra um málefni flugvallarins og skynsamlegasta leiðin væri að byggja bráðabirgðaflugstöð á vellinum.

Valgerður Sverrisdóttir, varaformaður Framsóknarflokksins, gerði flugvallarmálin að umtalsefni í óundirbúnum fyrirspurnum á Alþingi í dag. Sagði hún vandræðaástand ríkjandi varðandi flugvöllinn og hann drabbaðist niður meðan ekkert væri gert í hans málum. Benti hún á að Iceland Express hefði verið synjað um lóð á vellinum sem þýddi að samkeppni gæti ekki hafist í innanlandsflugi. Spurði hún ráðherra hvaða lausn hann sæi fyrir sér í þessum málum.

Kristján L. Möller sagði rétt að hálfgert vandræðaástand ríkti varðandi uppbyggingu á vellinum. Þannig hefði það verið í nokkur ár. Til stæði að byggja samgöngumiðstöð á flugvallarsvæðinu en ekki lægi fyrir hvenær sú uppbygging færi af stað.

Sagðist hann hafa rætt við Dag B. Eggertsson, þáverandi borgarstjóra, um málið í haust og það hefði verið sett í skipulagslegan farveg. Nú væri beðið eftir skipulagsyfirvöldum í borginni. Kristján sagði húsakost í tengslum við flugrekstur á vellinum í pattstöðu en menn vissu engu að síður að flugvöllurinn yrði í Vatnsmýri í mörg ár til viðbótar. Það væri óþolandi að flugið fengi ekki að þróast eins og það ætti að gera.

Ráðherra svaraði því til að ekki vantaði fjármuni til framkvæmdarinnar heldur leyfi frá Reykjavíkurborg til að hefjast handa við flugstöð. Hann hefði átt fund með forstjóra Flugfélags Íslands og borgarstjóra á mánudag þar sem staðan hefði verið ræddd. Menn hefðu rætt að skynsamlegasta leiðin væri að byggja hús sem gæti þjónað sem flugstöð en sem nota mætti í annað ef flugvöllurinn færi. Sagði hann unnið að krafti að málinu í sínu ráðuneyti.