Hafa þungar áhyggjur af niðurskurði fjárveitinga til lögreglu

Rannsóknarlögreglumenn sem vinna að fíkniefnamálum á Suðurnesjum lýsa þungum áhyggjum af niðurskurði fjárveitinga til embættisins á Suðurnesjum.

Þetta segja þeir gerast á sama tíma og stóraukning hafi orðið í verkefnum tengdum innflutningi fíkniefna um Flugstöð Leifs Eiríkssonar og neyslu og sölu fíkniefna á Suðurnesjum. Er það mat fíkniefnalögreglumannanna að komi til þessara aðgerða verði veruleg skerðing á aðgerðum lögreglu og tollgæslu í þessum málaflokki.

Eins og fram hefur komið í fréttum Stöðvar 2 gæti lögreglan á Suðurnesjum þurft að draga verulega saman í rekstri þar sem rekstaráætlun embættisins fyrir árið 2008 gerir ráð fyrir 200 milljónum króna umfram fjárheimildir. Segja fíkniefnalögreglumenn að sparnaðaraðgerðir gangi þvert gegn stefnu um auknar aðgerðir í fíkniefnamálum og í þeim felist lítill stuðningur stjórnvalda við fólkið sem Stöð 2 valdi menn ársins 2007.

Loks teljum við það sanngjarna kröfu að allri óvissu um framhald málsins verði eytt. Þessi umræða hefur nú þegar raskað starfsfriði, og ljóst að komi til þessara framkvæmda verður alger óvissa um öryggi flugfarþega í Leifsstöð og íbúa á Suðurnesjum, þar sem löggæsla á svæðinu er nú þegar í algeru lágmarki, og má ekki við frekari skerðingu," segir að endingu í yfirlýsingu fíkniefnalögreglumannanna.

Hún er send dómsmálaráðherra, Landsambandi lögreglumanna, Lögreglufélagi Suðurnesja og bæjarstjórnum á Suðurnesjum.