Fer fyrir 30 manna hópi á fundi kvennanefndar SÞ

Ingibjörg Sólrún Gísladóttir utanríkisráðherra fer fyrir um 30 manna hópi sem nú er staddur á fundi kvennanefndar Sameinuðu þjóðanna í New York. Aðalþema fundarins er fjármögnun jafnréttisbaráttunnar.

Fram kemur í tilkynningu frá utanríkisráðuneytinu að 45 ríki eigi sæti í nefndinni hverju sinn og lýkur kjörtímabili Íslands, sem átt hefur sæti í henni síðastliðin fjögur ár, með þessum fundi.

Utanríkisráðherra flytur ræðu á ráðherrafundi kvennanefndarinnar í dag og mun einnig taka þátt í hringborðsumræðum um reynsluna af jafnréttisbaráttunni, hvaða leiðir hafi gefist vel og hverjar síður. „Í ræðu sinni mun Ingibjörg Sólrún leggja áherslu á jafnréttismál sem eitt af lykilatriðum íslenskrar utanríkisstefnu og málefni þar sem styrkleiki Íslands á alþjóðavettvangi liggi. Einnig mun hún kynna þróunarverkefni Íslendinga sem miða að því að bæta stöðu kvenna víðs vegar um heim," segir í tilkynningunni.

Norðurlandaþjóðirnar standa fyrir sameiginlegum hliðarviðburði á fundinum þar sem fjallað verður um ráðstafanir til að berjast gegn ofbeldi karla gagnvart konum, heiðurstengt ofbeldi og ráðstafanir til að berjast gegn mansali. Ráðherra flytur þar ávarp og fjallar um hvað hefur verið gert til að koma í veg fyrir ofbeldi gagnvart konum á Íslandi.

Enn fremur verður Ísland í kastljósinu á miðvikudag þegar Stígamót, Kvenréttindafélag Íslands og UNIFEM standa fyrir viðburði sem kallast Gróska, kraftur, ánægja. Þar verður fjallað um hvernig Íslendingar efli konur til dáða, um stöðu innflytjendakvenna og um óvenjulega sýn á fegurðina en heimildarmynd Matthildar Helgadóttur, Óbeisluð fegurð verður, sýnd. Ennfremur mun Kristín Ástgeirsdóttir, forstöðukona Jafnréttisstofu, kynna tilhögun feðraorlofs á Íslandi í umræðum á miðvikudag.

Kvennanefnd Sameinuðu þjóðanna heyrir undir Efnahags- og félagsmálaráð SÞ og er markmið hennar að vinna að auknu jafnrétti karla og kvenna. Sú venja hefur skapast meðal Norðurlandaþjóðanna að eitt þeirra á þar ávallt sæti og tók Ísland sæti í nefndinni árið 2004. Svíar munu taka við keflinu af Íslendingum þegar fundinum lýkur 7. mars.