Ég er elst í heimi

Svo virðist sem hin 114 ára bandaríska kona Edna Parker sé ekki lengur elst í heimi samkvæmt Heimsmetabók Guiness, jafnvel þótt hún hafi ekki gefið upp öndina. Mariam Amash í ísraelska bænum Jisr az-Zarqa heldur því nefnilega fram að hún sé 120 ára, fædd árið 1888.

Þetta kom í ljós þegar hún sótti um nýtt nafnskírteini hjá ísraelskum yfirvöldum. Þau segja skírteinið gefið út á grundvelli fæðingarskírteinis sem gefið var út þegar Tyrkir réðu fyrir botni Miðjarðarhafs. Til þess að verða skráð sem elsta manneskja í heimi þarf Amash að senda gögn um það til Heimsmetabókarinnar, en það verk er enn eftir.

Amash er hin hressasta og segist enn borða, drekka og baða sig. ,,Ég vona að ég lifi í tíu ár í viðbót," segir hún og bætir við að lykilinn að langlífi sé að borða mikið af grænmeti.