Ramos-Horta haldið sofandi

Forseti Austur Tímor, Jose Ramos Horta var sýnt banatilræði í morgun á heimili sínu í höfuðborg landsins Dili. Horta var skotinn í magann og herma fregnir að honum sé haldið sofandi í öndunarvél. Liðhlaupi úr röðum stjórnarhersins sem hótað hefur ríkisstjórninni var drepinn á staðnum af öryggisvörðum forsetans.

Forsætisráðherra landsins, Sanana Gusmao var einnig sýnt tilræði á sama tíma en hann slapp ómeiddur. Í yfirlýsingu sem lesin var í útvarpi hvatti hann landsmenn til að sýna stillingu. Hann segir að um tilraun til valdaráns hafi verið að ræða og að liðhlaupinn sem felldur var á heimili Horta hafi staðið á bakvið hana.

Ramos-Horta hlaut friðarverðlaun Nóbels á sínum tíma.