Sarkozy blæs nýju lífi í úthverfi

Nicolas Sarkozy Frakklandsforseti er að leggja lokahönd á áætlun um að blása nýju lífi í úthverfi sem aðallega eru byggð innflytjendum. Meðal áforma er betri menntun og atvinnumöguleikar, sérstaklega fyrir ungt fólk.

Sem innanríkisráðherra árið 2005 var Sarkozy gagnrýndur fyrir að segja að hann myndi nota öfluga vatnsbyssu til að hreinsa stræti úthverfanna sem hann sagði byggð „múg".

Ummælin lét hann falla fyrir óeirðirnar sem leiddu til að franska ríkisstjórnin lýsti yfir neyðarástandi í landinu.

Á þeim tíma lofaði ríkisstjórnin að fjárfesta í fasteignum í hverfunum en mörgum finnst sem lítið hafi gerst nú tveimur árum síðar.

Áform Sarkozy munu taka til um 100 úthverfa í Frakklandi sem mest þurfa aðstoð.