McCain biðlar til íhaldssamra repúblikana

Öldungadeildarþingmaðurinn John McCain biðlar til íhaldsmanna innan repúblikanaflokksins eftir að Mitt Romney ákvað að draga sig í hlé úr kosningabaráttunni um útnefningu sem forsetaefni repúblikana fyrir bandarísku forsetakosningarnar sem fara fram síðar á árinu.

McCain biður stuðningsmenn Romneys um að fylkjast að baki sér. Romney lýsti ekki yfir stuðningi við McCain í gær en sagði að mikilvægt væri að repúblikanar sameinuðust um einn sterkan frambjóðanda. Ákvörðun Romneys var tekin eftir slakt gengi hans á supertuesday, þegar forval fór fram í meira en 20 fylkjum Bandaríkjanna. Romney sagði að þetta hefði ekki verið auðveld ákvörðun fyrir sig eða fjölskyldu sína en að það hefði einungis verið til að styrkja stöðu demókrata ef hann hefði haldið áfram baráttunni fram á sumar.

Romney sagði að þrátt fyrir að hann og McCain væru ósammála um mörg málefni væru þeir báðir sammála um að Bandaríkin þyrftu að gera hvað sem þyrfti til að ná árangri í Írak og berjast gegn hryðjuverkum. Stjórnmálaskýrendur bresku útvarpsstöðvarinnar BBC segja að kosningabarátta Romneys hafi kostað hann tugi milljóna.

Mike Huckabee og Ron Paul hafa ekki enn dregið sig í hlé frá kosningabaráttunni en talið er að þeir eigi enga raunverulegan möguleika á að sigra McCain.