Tadic sigurvegari forsetakosninga í Serbíu

Núverandi forseti Serbíu Boris Tadic hlaut meira en 50 prósent atkvæða í úrslitaumferð forsetakosninganna í landinu í dag. Kosningaþátttaka var sú mesta frá árinu 2000. Keppinautur hans Tomislav Nikolic viðurkenndi ósigur.

Stuðningsmenn Tadic flykktust út á götur Belgrad til að fagna sigrinum og víða mátti heyra bílflautum þeytt í sigurgleðinni.

Kosningarnar voru taldar prófsteinn á samband landsins við Evrópu en þar gætir enn einangrunar frá valdatíma Slobodan Milosevic á tíunda áratugnum. Tadic er mikill Evrópusinni en Nikolic vildi styrkja tengsl við Rússa.

Báðir frambjóðendurnir eru á móti sjálfstæði Kosovo sem aðallega er byggð Albönum. Búist er við að héraðið lýsi yfir sjálfstæði þrátt fyrir það innan nokkurra daga.