Þúsundir flýja óeirðir í Kenía

Þúsundir íbúa flýðu þegar ættbálkagengi brenndu heimili og teekrur í Rift dalnum í Kenía í dag. Enn heldur óöldin áfram í landinu þrátt fyrir samkomulag milli stríðandi fylkinga um að enda blóðbað liðinna vikna.

Hjálparstarfsmenn segjast hafa óstaðfestar fregnir af því að allt að 20 manns hafi verið drepnir í óeirðum í bæjunum Kericho, Sotik og Kisii í dalnum síðan á fimmtudag.

Kofi Annan fyrrverandi framkvæmdastjóri Sameinuðu þjóðanna hafði milligöngu um samkomulag milli andstæðra stjórnmálaflokka í gær þar sem kveðið var á um tafarlausar aðgerðir til að enda ofbeldið sem kviknaði eftir úrslit forsetakosninganna í desember. Næstum 900 manns hafa látist og meira en 250 þúsund flúið heimili sín.