Sarkozy kvænist Bruni

Nicolas Sarkozy forseti Frakklands og Carla Bruni söngkona og fyrrverandi fyrirsæta gengu í hjónaband í París í dag. Þetta er haft eftir Francois Lebel borgarstjóra Parísar í frönskum fjölmiðlum en hann gaf hjónin saman.

Talsmaður forsetans vildi ekki tjá sig um málið en vitni segja að athöfnin hafi farið fram í Elysee-höllinni sem er opinbert heimili forseta Frakklands. Ástarsamband Sarkozy við Bruni hefur orðið til mikilla getgáta frönsku pressunnar síðustu mánuði.

Forsetinn skildi við fyrrverandi konu sína, Cecelia, í október síðastliðnum.

Sarkozy er 53 ára og Bruni fertug. Þau voru gefin saman í viðurvist nánustu fjölskyldu og vina samkvæmt Lebel borgarstjóra. Hann bætti við að athöfnin hefði verið augnablik náinna tengsla. Hún hefði verið látlaus og augljós ástúð hefði ríkt á milli hjónakornanna.

Bruni fæddist í Turin á Ítalíu 23 desember árið 1967. Foreldrar hennar eru auðkýfingurinn og klassíska tónskáldið Alberto Bruni og píanóleikarinn Marysa Borini. Fjölskyldan flutti til Frakklands þegar hún var barn.

Í fjölmiðlum hefur Bruni verið lýst sem „mann-ætu" því hún hafi átt í ástarsamböndum við fjölda frægra manna eins og Eric Clapton, Mick Jagger, Donald Trump og Laurent Fabius fyrrverandi forsætisráðherra. Þá hefur komið fram að hún hafi átt í sambandi við útgefandann Jean-Paul Enthoven áður en hún fór að vera með syni hans, heimspekingnum Raphael Enthoven. Þau giftust og eignuðust son.

„Ég lifi einlífi á tímabilum, en ég kýs fjölkvæni," sagði hún tímaritinu Figaro Madame fyrir ári síðan og bætti við: „Ástin endist í langan tíma, en ástríðan í tvær eða þrjár vikur."