Pólland hýsir eldflaugavarnarkerfi Bandaríkjamanna

Pólland og Bandaríkin hafa náð samkomulagi í helstu aðalatriðum um að koma upp umdeildu bandarísku eldflaugavarnarkerfi í landinu. Í samningnum fá Pólverjar hjálp Bandaríkjamanna við að efla loftvarnir sínar. Bandaríkjamenn vilja einnig koma upp stöð fyrir eldvarnarflaugar og radarstöð í Tékklandi.

Rússar eru alfarið á móti áformunum og segja þau munu ógna stöðugleika alþjóðaöryggis og veikja kjarnorkuvarnarkerfi þeirra.

Í október bar Vladimir Putin Rússlandsforseti fyrirætlanirnar saman við Kúbudeiluna á sjöunda áratugnum þegar Bandaríkin og Sovétríkin voru á barmi kjarnorkustríðs við Kúbu vegna eldvarnarflauga.

Rússar hafa hótað að beina eldvarnarflaugum að Evrópu ef staðsetning bandarísku stöðvanna verði nálægt landamærum Rússlands. Viðbrögð Pólverja við þeirri yfirlýsingu eru þau að þeir vilji efla loftvarnir sínar.

Radek Sikorsky utanríkisráðherra Póllands sem er í Washington sagðist vera sáttur við að komið yrði til móts við ótta Pólverja um öryggi sitt í samningnum. Þó væri enn mikil sérfræðivinna eftir

Condoleezza Rice utanríkisráðherra Bandaríkjanna sagði að Bandaríkjamenn hefðu skilning á að Pólverjar vildu nútímavæða loftvarnir sínar; „Við styðjum það af því að það gerir bandamenn okkar, Pólverja, færari."

Bandaríkin vilja koma fyrir 10 eldvarnarflaugum til varnar mögulegri árás þess sem þeir kalla svikalanda, eins og Íran og Norður Kóreu.