Kærleikar með Clinton og Obama í kappræðum

Barack Obama og Hillary Clinton sýndu á sér sínar bestu hliðar í kappræðum demókrata í Bandaríkjunum í gærkvöldi og féllust síðan í faðma að umræðum loknum.

Obama og Clinton voru augljóslega búin að ákveða að segja skilið við þrætur undanfarinna daga sem voru farnar að harðna og lýsa sívaxandi pirringi. Obama tók skýrt fram að hann hefði verið vinur Clinton og yrði það áfram þegar baráttan væri yfirstaðin.

Clinton tók undir það en þegar spurt var hvort ekki væri komið nóg af valdaferli tveggja fjölskyldna, Bush- og Clinton-fjölskyldnanna, svaraði hún svona: „Það þurfti Clinton til að hreinsa til eftir hinn fyrri Bush og ætli það þurfi ekki annan Clinton til að hreinsa til eftir þann síðari."

Þessi ummæli fengu mest klapp í nótt en umræðurnar fóru fram milli eitt og þrjú að íslenskum tíma.

Fram kom að stefnumál þeirra væru ákaflega svipuð. Bæði vilja bæta heilsugæslu þó að Clinton vilji að sjúkratryggingakerfi sem nái til allra en Obama vilji ekki að allir séu skyldaðir til að hafa sjúkratryggingu. Hann lofar að kveða hermenn heim frá Írak innan sextán mánaða en hún vill ekki binda sig við neinar tímasetningar.

Forkosningar verða í rúmlega tuttugu fylkjum á þriðjudag og þá kann að koma í ljós hvor þeirra tveggja verður forsetaframbjóðandi demókrata í kosningunum í nóvember.