Palestínumenn selja ísraelsk gróðurhús í Egyptalandi

Þegar Hamas liðar sprengdu upp múr á landamærum Gaza strandarinnar og Egyptalands, þustu tugþúsundir Palestínumanna yfir landamærin til þess að kaupa nauðsynjar sem eru af skornum skammti á ströndinni.

En það fóru ekki allir til þess að kaupa. Sumir fóru til þess að selja.

Yahya Salama fór yfir landamærin til þess að selja Egyptum ísraelsk gróðurhús. Þegar Ísraelar yfirgáfu Gaza ströndina skildu þeir meðal annars eftir gríðarlegan fjölda af gróðurhúsum, sem Palestínumenn gátu nýtt sér.

Vegna lokunar landamæra Gaza að Ísrael hafa Palestínumenn hinsvegar ekki getað selt framleiðslu sína. Því ákvað Salama að kaupa gróðurhúsin ódýrt á ströndinni og selja þau með hagnaði í Egyptalandi.

Og Salama hefur selt vel. Ísraelsku gróðurhúsin eru miklu betri en þau sem Egyptar hafa aðgang að.

Þau eru léttari og sterkari og með mun fullkomnari búnaði bæði til þess að vökva og verjast vírusum og sníkjudýrum.

Egyptar hafa því keypt öll gróðurhúsin sem Salama hefur getað dröslað yfir landamærin í traktorskerrunni sinni.