Rifust um það hver væri mesti íhaldsmaðurinn

Frambjóðendur Repúblikanaflokksins í Bandaríkjunum rifust harkalega um það hver væri mesti íhaldsmaðurinn í sjónvarpskappræðum í gærkvöldi.

Mitt Romney og John McCain tókust harkalega á í umræðuþættinum í gærkvöldi, svo mjög að hinir frambjóðendurnir tveir urðu því sem næst út undan. McCain þykir hafa náð forystu í baráttunni og Romney saumaði að honum.

Romney sagði að skoðanir McCain væru langt til vinstri frá meginstraumum í Repúblikanaflokknum enda gæti McCain vart verið íhaldsmaður fyrst hann hefði fengið stuðning frá dagblaðinu New York Times.

McCain svaraði með því að segja að hann hefði líka fengið stuðning íhaldsblaða og það sýndi að hann gæti höfðað til fólks úr báðum flokkum.

Hvor um sig reyndi að yfirbjóða hinn í stuðningi við stríðið í Írak. Báðir reyna nú hvað þeir geta til að fá stuðning fyrirmanna í Repúblikanaflokknum. Arnold Scwartzenegger ríkisstjóri Kaliforníu sagði fyrir kappræðurnar í gær að hann myndi fylgjast með þeim og hugsanlega lýsa yfir stuðningi við annan hvorn eftir þær. Talið er líklegra að það verði McCain sem nú er á fljúgandi ferð í sinni baráttu.