Danir krefja Bandaríkjamenn svara um fangaflug

Upplýsingar um fangaflugið komu fram í þætti á danska ríkisútvarpinu í gærkvöldi. Þar var meðal annars rætt við Michael Scheuer sem stjórnaði hinu ólöglega fangaflugi CIA um allan heim á árunum 1995 til 2004. Um var að ræða flutninga á meintum hryðjuverkamönnum til leynilegra fangelsa. Útvarpsþátturinn bar heitið Danska tengingin við CIA og þar kom fram að leyniþjónustan hefði notast við skúffufélög í sinni eigu til að skrá flugvélarnar og gefa upp rangar upplýsingar um hvað væri verið að flytja með þeim. Í einhverjum tilvika hinsvegar var notast við flugvélar í eigu hins opinberra í Bandaríkjunum. Stig Möller segir að slíkt hafi hann ekki heyrt áður. Hann telur það algerlega óásættanlegt og þyrfti að ræða við Bandaríkjamenn. Danir hafa áður reynt að fá upplýsingar um ólöglegt fangaflug CIA um lofthelgi þeirra en aldrei fengið nein svör frá bandarískum stjórnvöldum. Á leið til Grænlands hafa flugvélar CIA þurft að fljúga um íslenska flugstjórnarsvæðið. Grunsemdir hafa varið á lofti hérlendis um að einhverjar af þessum vélum hafi lent á Íslandi en slíkt hefur aldrei fengist staðfest.