Milljónir Kínverja sitja fastir vegna óveðurs

Samgöngur í suðurhluta Kína eru lamaðar vegna mikils vetrarveðurs sem geysað hefur þar að undanförnu. Milljónir Kínverja eru strandaglópar af þessum sökum á járnbrautarstöðvum og flugvöllum en framundan er einhver mesta ferðahelgi ársins í landinu.

Kínverjar halda nýár sitt hátíðlegt uppúr mánaðarmótum og því eru margir þeirra á faraldsfæti þessa daganna. Gífurleg snjókoma, blindbylir og frosthörkur hafa hinsvegar sett strik í reikinginn í suðurhluta landsins.

Á járnbrautarstöðinni í Sjanghæ sitja nú um 200.000 manns fastir og bíða þess að veðrinu sloti. Reiknað er með að þessi fjöldi geti stigið í 600.000 manns áður en tekst að koma járnbrautarsamgöngunum á að nýju.

Um er að ræða versta veður sem skollið hefur á þessu svæði undanfarin 50 ár. Og veðurfræðingar reikna með að veðrið færist í aukana á næstu dögum. Alls er talið að tæplega 70 milljónir Kínverja hafi orðið fyrir barðinu á vetrarveðrinu og ófærðinni sem því hefur fylgt en nær allir flugvellir á þessum slóðum eru lokaðir sem og aðrar umferðarstöðvar.

Ástandið er hvað alvarlegast í héraðinu Guangdong sem liggur upp að Hong Kong. Þar bíða hundruðir þúsunda farandverkamanna eftir tækifæri til að komast til síns heima áður en hátíðahöldin hefjast.