Höfuðpaurinn í sprengjuárásinni í Madrid 2004 handtekinn

Sá sem talinn er hafa skiplagt sprengjuárásina á járnbrautarstöð í Madrid á Spáni árið 2004 hefur verið handtekinn í Marokkó. Alls drápust nær 200 manns í árásinni.

Maðurinn, Abdelilah Hirz, verður dreginn fyrir rétt í Marokkó en að sögn spænskra yfirvalda verður það í fyrsta sinn sem yfirvöld í Marokkó rétta í máli eins og þegnum sínum sem sakaður er um glæpi í öðru landi. Hirz var handtekinn í borginni Rabat og þar verða réttarhöldin.

Spænsk stjórnvöld fóru fram á að Hirz yrði handtekinn en sannanir fyrir aðild hans að sprengjuárásinni í Madrid eru töluverðar. Meðal annars fundust DNA spor í rústum íbúðarinnar sem sjö af tilræðismönnunum flúðu til eftir árásina. Þar frömdu þeir sjálfsmorð með því að sprengja sig í loft upp. DNA sporin sem tengja Hriz við íbúðina fundist í greiðu og á buxum í rústunum. Auk þess fundust fingraför Hirz á sveitabæ þeim þar sem tilræðismennirnir undirbjuggu tilræðið.

Á síðasta ári voru yfir tuttugu manns sem tengjast sprengjuárásinni dæmdir í mislanga fangelsisdóma á Spáni.