250 börnum haldið í gíslingu í Pakistan

Byssumenn halda enn um 250 börnum í gíslingu í skóla í norðvesturhluta Pakistans.

Mennirnir eru sagðir á bilinu fimm til sjö talsins en þeir ruddust inn í skólann fyrir nokkrum klukkustundum. Þeir munu hafa lent í átökum við lögreglu og leitað skjóls í skólanum og hefur lögregla og her nú umkringt hann og reynir nú að semja um lausn barnanna. Óstaðfestar fregnri herma að hluta hópsins hafi verið sleppt. Fjölskyldur barnanna hafa safnast saman við skólann. Ekki er vitað hvort mannræningjarnir séu á vegum tiltekins baráttuhóps en herskáir stuðningsmenn talibana hafa í síauknum mæli látið til sín taka á þessu svæði.