Samstarfsmaður Shinawatra kjörinn forsætisráðherra Taílands

Taílenska þingið kaus í dag Samak Sundaravej, nýjan forsætisráðherra landsins, í kjölfar þingkosninga sem fram fóru í landinu í síðasta mánuði.Flokkur hins nýja forsætisráðherra hlaut flest atkvæði í kosningunum og myndaði nýja ríkisstjórn ásamt fimm öðrum flokkum.

Samak er náinn samstarfsmaður Thaksin Shinawatra, fyrrverandi forsætisráðherra, sem herinn kom frá völdum fyrir um 16 mánuðum í valdaráni. Það gerði herinn eftir að niðurstöður þingkosninga í febrúar árið 2006 voru ógiltar og upplausnarástand skapaðist í stjórnmálalífi landsins.

Samak á að baki langan feril í stjórnmálum og var meðal annars ríkisstjóri í Bangkok. Hann þykir þó umdeildur líkt og forveri hans Shinawatra og sætir meðal annars rannsókn vegna gruns um spillingu.

Engu að síður er kosning hans í embætti forsætisráðherra álitin liður í því að koma aftur á lýðræðislegri stjórn í landinu. Þá er kjörið talið geta greitt fyrir því að Shinawatra snúi aftur til Taílands, en hann hefur verið í útlegð frá því herinn rændi völdum árið 2006.