Abbas vill að Palestínumenn annist landamæravörslu

Abbas forseti palestínsku heimastjórnarinnar ætlar að leggja til við Ísraela að sveitir hans yfirtaki stjórn landamæra Gaza-svæðisins og Egyptalands. Abbas hittir Olmert forsætisráðherra á morgun. Íbúar Gaza fóru þúsundir saman yfir til Egyptalands á ný í morgun.

Í morgun komust Palestínumenn óáreittir frá Gaza yfir til Egyptalands á ný eftir að litlu munaði að til átaka kæmi í gærkvöldi. Þá reyndu egypskir hermenn að loka landamærunum með gaddavírsgirðingu. En Palestínumenn urðu æfir og köstuðu grjóti að hermönnum, sem svöruðu með því að sprauta vatni úr háþrýstibyssum á fólkið. Einn hermaður fékk skot í fót.

Eftir það hörfuðu egypsku hermennirnir og í morgun var engan þeirra að sjá við landamærin. Egyptar segjast ekki munu líða það til lengdar að landamærin verði opin á þennan hátt milli Egyptalands og Gaza, sem er í raun hernámssvæði Ísraela þó að þeir hafi dregið herafla sinn af svæðinu. Á morgun ætla Abbas forseti heimastjórnar Palestínumanna og Olmert forsætisráðherra Ísraels að hittast á fundi, sem er liður í friðarferlinu sem nú er hafið á ný eftir sjö ára hlé.

Abbas segist munu leggja til að sveitir palestínsku heimastjórnarinnar gæti landamæranna. Markmið viðræðnanna er að ná friðarsamningi fyrir árslok - en uppákoma undanfarinna daga við Gaza svæðið flækir málið, og getur orðið til að tefja fyrir lausn þessarar sex áratuga löngu deilu Ísraela og Palestínumanna.