26 þúsund börn deyja á dag af völdum auðlæknanlegra sjúkdóma

Nærri tíu milljón börn deyja á ári hverju áður en þau ná fimm ára aldri - tuttugu og sex þúsund börn á dag. Banamein getur verið allt frá lungnabólgu til malaríu. Þetta kemur fram í nýrri skýrslu Barnahjálpar Sameinuðu þjóðanna. Barnadauði er minnstur í sex löndum heims, þar á meðal á Íslandi.

Í árlegri skýrslu Barnahjálparinanr um stöðu barna í heiminum segir að Ísland sé enn með lægstu tíðni barnadauða, það er dauða barna innan við fimm ára, í heiminum ásamt Andorra, Liechtenstein, San Marínó, Síngapúr og Svíþjóð. Dregið hafi úr barnadauða á Íslandi um fimmtíu og sjö prósent síðan 1990.

Samtökin segja að nú mælist barnadauði um gjörvallan heiminn á ári í fyrsta sinn undir tíu milljónum, það er 9,7 milljónir barna. Það þýði samt að tuttugu og sex þúsund börn verði auðlæknandi sjúkdómum að bráð á degi hverjum. Áttatíu prósent þeirra í Afríku sunnan Sahara og Suður-Asíu. Þrátt fyrir framfaraspor í Afríku, Suður-Asíu og Miðausturlöndum bendi ekkert til þess að hægt verði að minnka barnadauða á ári hverju í fimm milljónir fyrir árið 2015 líkt og stefnt hafi verið að.

Samtökin halda þó baráttunni áfram. Knattspyrnuhetjan David Beckham er velgjörðarsendiherra Barnahjálparinnar. Hann heimsótti börn á heilsugæslustöðvum í Síerra Leone í vikunni. Þar deyr fjórða hvert barn áður en það nær að verða fimm ára.