Tíu menn rændu póstflokkunarstöð í Gautaborg

Mikil skelfing greip um sig í Gautaborg í Svíþjóð í dag þegar bíræfið póstrán var framið þar.

Tíu grímuklæddir menn, vopnaðir rifflum, réðust inn á póstflokkunarstöð í miðborginni, ógnuðu starfsmönnum og rændu verðmætum. Heimildir sænskra miðla herma að ræningjarnir hafi haft jafnvirði þrjátíu milljóna íslenskra króna á brott með sér en það hefur ekki verið staðfest.

Áður en mennirnir lögðu á flótta kveiktu þeir í bílum nærri póstmiðstöðinni og dreifðu nöglum um allar götur. Fimm grunsamlegir pakka fundust á sama tíma víða um borgina - meðal annars fyrir utan miðstöð lögreglu.

Þá var stórum hluta miðborgarinnar lokað meðan þeir voru rannsakaðir. Ekki var um sprengjur að ræða. Allt tafði þetta eftirför lögreglu sem hefur enn ekki handtekið neinn í tengslum við ránið.