Omar bin Laden: Pabbi hættu þessu ofbeldi

Omar bin Laden sonur mest eftirlýsta manns í heimi vill að faðir hans Osama bin Laden snúi við blaðinu og hverfi frá ofbeldi. Omar segist síðast hafa séð föður sinn árið 2000 í Afghanistan þegar hann ákvað að hætta í al Qaeda.

Þetta sagði hann í viðtali við CNN sjónvarpsstöðina sem tekið var skammt frá Cairo höfuðborg Egyptalands. Omar sem vinnur sem verktaki segist koma fram opinberlega nú vegna þess að hann vilji binda endi á ofbeldið sem faðir hans hefur hvatt til og orsakað, ofbeldi sem hafi kostað líf saklausra borgara í sprengjuárásum um allan heim, þar á meðal fórnarlömb árásanna á Bandaríkin 11. september 2001. Hann hvetur pabba sinn til að finna aðra leið til að ná markmiðum sínum.

Omar talaði á bjagaðri ensku sem hann hefur lært eftir að hann giftist breskri eiginkonu sinni á síðasta ári; „Þessi sprengja, þessi vopn. Það er ekki gott að nota þetta fyrir neinn." Hann sagði skilaboðin ekki einungis frá honum sjálfum. Vinur föður hans og aðrir múslimar hefðu lýst þessari skoðun sinni.

Aðspurður að því hvort hann telji að faðir hans muni einhvern tíman nást sagðist hann vera þess fullviss að svo yrði ekki því hann hefði stuðning heimamanna. Omar og eiginkona hans vinna nú að undirbúningi herferðar sem er nokkuð ólík herferð föður hans. Þau ætla að stofna samtök fyrir friði.