Bosingwa tæpur fyrir fyrsta leik

Jose Bosingwa, hægri bakvörður Chelsea, gæti misst af byrjun tímabilsins á Englandi. Þessi portúgalski landsliðsmaður meiddist í æfingaleik með Chelsea í Asíu fyrr í vikunni.

Bosingwa var keyptur frá Porto á 16 milljónir punda í sumar en hann verður frá í um þrjár vikur vegna meiðslana. Fyrsti leikur Chelsea á tímabilinu verður gegn Portsmouth 17. ágúst.

Bosingwa er 25 ára og lék aðeins í 20 mínútur gegn kínverska liðinu Guangzhou Pharmaceuticals áður en hann fór meiddur af velli fyrir Paulo Ferreira.