Spielberg hættur að aðstoða Kínverja á ÓL vegna málefna Súdans

Bandaríski kvikmyndaframleiðandinn Steven Spielberg er hættur sem listrænn ráðgjafi kínverskra stjórnvalda vegna Ólympíuleikanna í Peking í ár þar sem honum þykir Kínverjar ekki beita sér nóg í málefnum Súdans.

Súdanar og Kínverjar eiga í miklum ollíuviðskiptum og þá hafa Kínverjar selt súdönskum yfirvöldum vopn sem talið er að séu notuð í hinu stríðshrjáða Darfur-héraði. Þar hafa nú þegar 200 þúsund manns látist og yfir tvær milljónir þurft að flýja heimili sín vegna átaka uppreisnarmanna í Darfur og arabískra vígasveita sem sagðar eru hliðhollar stjórnvöldum í Kartúm, höfuðborg Súdans. Þá hafa Kínverjar tekið málstað súdanskra stjórnvalda í öryggisráði Sameinuðu þjóðanna.

Í yfirlýsingu í dag sakaði Spielberg Kínverja um að þrýsta ekki nógu mikið á Súdana til þess að binda enda á hörmungar í Darfur. ,,Samviska mín leyfir mér ekki að halda áfram vinnu minni. Ég get ekki eytt orku og tíma í atburði á Ólympíuleikunum heldur verð ég að gera allt sem ég get til að aðstoða við að binda enda á hina hryllilegu glæpi gegn mannkyni sem framdir eru í Darfur," sagði Spielberg enn fremur.

Spielberg sagði súdönsk stjórnvöld bera meginábyrgðina í málinu en alþjóðsamfélagið, sérstaklega Kína, ætti að beita sér betur.