Kennari við Yale í rannsóknarnefndina

Sigríður Benediktsdóttir, kennari við hagfræðideild Yale-háskóla hefur verið ráðin í nefnd sem á að rannsaka aðdraganda og orsök falls íslensku bankanna.

Nefndin er þá fullmönnuð en áður hafði forsætisnefnd Alþingis skipað þá Pál Hreinsson hæstarréttardómara og Tryggva Gunnarsson umboðsmann alþingis í nefndina.

Sigríður Benediktsdóttir hefur verið kennari við Yale-háskóla síðan 2007, en á árunum 2005-2007 starfaði hún hjá bankastjórn Seðlabanka Bandaríkjanna í Washington. Hún lauk BS-prófi í tölvunarfræðum frá Háskóla Íslands 1995 og BS-prófi í hagfræði frá sama skóla 1998. Hún lauk tveimur meistaragráðum við Yale 2000 og 2001 og doktorsprófi frá sama skóla í hagfræði árið 2005.

Páll Hreinsson hefur verið dómari við Hæstarétt síðan 1. september 2007. Hann var áður prófessor við lagadeild Háskóla Íslands og var sæmdur doktorsgráðu frá sama skóla árið 2005. Tryggvi Gunnarsson hefur gengt embætti umboðsmanns Alþingis síðan 1. nóvember 1998, en var áður sjálfstætt starfandi lögmaður.