Lukasz Serwatko sigraði í Stóru upplestrarkeppninni

Lukasz Serwatko, pólskur nemandi Heiðarskóla, bar sigur úr býtum á lokahátíð Stóru upplestrarkeppninnar sem fór fram í gær í Bíósal Duushúsa í Reykjanesbæ. Í öðru sæti var Hera Ketilsdóttir úr Myllubakkaskóla og í því þriðja Ingibjörg Ýr Smáradóttir úr Njarðvíkurskóla.

Tólf lesarar öttu kappi fyrir hönd sex skóla. Keppendur lásu kafla úr sögunni Nonni eftir Jón Sveinsson, ljóð eftir Stein Steinarr og síðan ljóð að eigin vali. Þá las Jenný María Unnarsdóttir úr 8. bekk í Heiðarskóla kynningu á skáldi hátíðarinnar en Jenný var í 2. sæti í keppninni í fyrra.

Nemendur úr 7. bekk sáu um tónlistarflutning á hátíðinni.