Cech hefur haldið marki Chelsea hreinu 100 sinnum

Markvörðurinn Petr Cech er í skýjunum með að hafa haldið marki Chelsea hreinu í hundraðasta sinn. Hann hefur aðeins leikið 180 leiki fyrir félagið en haldið marki þess hreinu í hundrað þeirra.

Cech setur nú stefnuna á að slá félagsmet Chelsea sem Peter Bonetti á. Bonetti hélt marki Chelsea hreinu í 205 leikjum. „Ef ég held áfram á þessari braut mun ég bæta þetta met innan fimm ára," sagði Cech.

„Ég er stoltastur af því að hafa haldið hreinu svona oft í ensku úrvalsdeildinni og Meistaradeildinni, tveimur af sterkustu fótboltakeppnum heims. Aðrir leikmenn eiga líka þátt í þessu afreki, án varnarmanna gæti ég ekki haldið hreinu."