Senderos lánaður til Milan

Arsenal hefur lánað svissneska varnarmanninn Philippe Senderos til AC Milan út keppnistímabilið.

AC Milan á svo möguleika á því að festa kaup á Senderos næsta sumar en félagið hefur verið á höttunum eftir miðverði síðan að Alessandro Nesta meiddist.

Milan var einnig orðað við Branislav Ivanovic, leikmann Chelsea, en ekkert varð úr því að hann kæmi.

Arsenal keypti Mikael Silvestre frá Manchester United í síðustu viku sem hefði væntanlega þýtt að tækifæri Senderos hjá Arsenal hefðu verið af skornum skammti.