Tottenham færði Liverpool fyrsta tapið

Tottenham varð í kvöld fyrsta liðið til að leggja Liverpool að velli í ensku úrvalsdeildinni í knattspyrnu. Tottenham vann dramatískan 2-1 sigur í blálokin á leik sem var eign gestanna lengst af.

Hollendingurinn Dirk Kuyt kom Liverpool yfir með þrumuskoti strax á þriðju mínútu leiksins og þannig var staðan allt þar til 20 mínútur voru eftir af leiknum. Þá skallaði varnarmaðurinn Jamie Carragher boltann í eigið net eftir fyrirgjöf frá David Bentley.

Þegar komið var fram yfir venjulegan leiktíma var svo Bentley aftur á ferðinni. Hann átti fast skot að marki sem Reina í marki Liverpool náði að verja, en boltinn barst til Darren Bent sem lagði boltann fyrir Roman Pavlyuchenko sem renndi honum í netið.

Liverpool var sem fyrr segir sterkari aðilinn í leiknum og höfnuðu tvö skot liðsins í markrammanum, en inn vildi boltinn ekki. Markvörður Tottenham, Heurelho Gomes var sem fyrr skrautlegur í meira lagi en sirkustilburðir hans kostuðu lið hans þó ekki mark að þessu sinni.

Tottenham hefur því náð í sjö stig í leikjunum þremur síðan Harry Redknapp tók við liðinu. Rétt eins og gegn Arsenal á dögunum, var Tottenham yfirspilað á löngum köflum, en hafði heilladísirnar á sínu bandi - nokkuð sem ekki var um að tala í fyrstu átta leikjum tímabilsins.

Tapið í dag þýddi að Liverpool náði ekki að endurheimta toppsætið í deildinni, en þar situr Chelsea nú með 26 stig líkt og þeir rauðu en með betri markatölu.

Manchester United er í þriðja sætinu með 21 stig og Arsenal, Aston Villa og Hull hafa 20 stig. Villa á leik til góða.

Tottenham náði að lyfta sér af botni deildarinnar með sigrinum í dag og hefur nú hlotið 9 stig líkt og Newcastle. Bolton er neðst með 8 stig.