Beðið eftir matsgerð í máli Alcan gegn olíufélögum

Fyrirtaka var í máli Alcan á hendur stóru olíufélögunum þremur í Héraðsdómi Reykjavíkur í dag en málinu var frestað fram í maí þar sem beðið er eftir matsgerð frá matsmanni.

Aðalkrafa Alcan á hendur Olís, Keri og Skeljungi hljóðar upp á um 187 milljónir króna og er það vegna tjóns sem félagið telur sig hafa orðið fyrir vegna samráðs olíufélaganna. Varakröfur félagsins byggjast á því hægt er að reikna tjón félagsins út á mismunandi hátt.

Alcan byggir á því að vegna samráðs félaganna þriggja hafi álframleiðandinn þurft að borga hærra verð fyrir vörur frá þeim en ella. Tjón Alcan er ekki bundið við eitt útboð heldur kaup á ákveðnu tímabili, það er frá því snemma á tíunda áratug síðustu aldar þegar samkeppnislög tóku gildi fram til 2003 þegar húsleit var gerð hjá olíufélögunum. Að sögn Hjördísar Halldórsdóttur, lögmanns Alcan, er Alcan eitt þeirra félaga sem nefnd eru í skýrslu Samkeppnisstofnunar um samráð olíufélaganna og á þeim grundvelli sé málið höfðað.

Lögmenn Alcan óskuðu eftir dómskvöddum matsmanni til þess að meta tjónið og er nú beðið eftir matsgerð hans.