Langþreyttir á ástandinu inni á Kleppi

Tregða í kerfinu veldur því að tugir einstaklinga dvelja að óþörfu inni á Kleppsspítala segir framkvæmdastjóri Geðhjálpar. Hann segir menn langþreytta á ástandinu inni á Kleppi.

Í kvöldfréttum Stöðvar 2 í gærkvöldi greindum við frá því að ekki er hægt að útskrifa 50 einstaklinga sem lokið hafa meðferð á endurhæfingardeild Landspítalans að Kleppi vegna skorts á félagslegum leiguíbúðum.

Hátt í 700 manns eru á biðlista eftir félagslegum leiguíbúðum í Reykjavík og hafa þessir einstaklingar sem um ræðir ekki efni á að fara á almennan leigumarkað.

Árið 2005 var farið í átak í uppbyggingu á búsetuúrræðum fyrir geðfatlaða á vegum félagsmálaráðuneytisins þar sem útvega átti 160 íbúðir fram til ársins 2010. Einum milljarði af söluandvirði Símans var ráðstafað í verkefnið auk þess sem Framkvæmdastjóður Fatlaðra lagði til hálfan milljarð.

Samkvæmt upplýsingum frá félagsmálaráðuneytinu er verkefnið á áætlun og hafa um 80 íbúðir þegar verið teknar í notkun. Hins vegar hefur gengið erfiðlega að útvega íbúðir á höfuðborgarsvæðinu þar sem þörfin á búsetuúrræðum er hvað mest.

Í samtali við Fréttastofu segir Sveinn Magnússon, framkvæmdastjóri Geðhjálpar, að þar á bæ séu menn orðnir langþreyttir á ástandinu. Hann segir að þeir einstaklingar sem fastir eru að Kleppi séu mjög veikir einstaklingar sem þurfi á umönnun að halda allan sólarhringinn og að aðstaða þeirra sé síst til þess fallin að bæta heilsu þeirra.

Sveinn segir að fréttir af skorti á búsetuúrræðum séu í sjálfu sér ekki nýjar fréttir, en þær séu staðfesting á samskiptaörðugleikum innan stjórnkerfisins.

Síðan verkefni félagsmálaráðuneytisins var hrundið af stað hafa fjórir ráðherrar gegnt stöðu félagsmálaráðherra og segir Sveinn að þessi hringlandaháttur sé síst til þess fallinn að bæta ástandið. Segist hann þó vilja gefa núverandi ráðherra ráðrúm til að koma með tillögur til úrbóta.