Hafa þungar áhyggjur af yfirvofandi niðurskurði

Félagar í Lögreglufélagi Suðurnesja lýsa yfir þungum áhyggjum af yfirvofandi niðurskurði hjá embætti lögreglu- og tollstjórans á Suðurnesjum.Þetta kemur fram í ályktun sem samþykkt var á fundi félagsins í dag.

Þar er einnig bent á að rekstur embættisins sé ólíkur rekstri annarra embætta að því leyti að aðeins helmingur rekstrarins sé á fjárlögum en aðrar fjárheimildir komi af sértekjum. ,,Þessar sértekjur eru óstöðugar og þegar þær bresta þá eru allar rekstrarforsendur í uppnámi. Ljóst er að kostnaður við rekstur embættisins hefur fylgt verðlagsþróun þó að fjárveitingar til embættisins hafi það ekki. Það eru þessir þættir sem munu stuðla að niðurskurði hjá embættinu," segir í ályktuninni.

Styðja félagsmenn í lögreglufélaginu fullkomlega lögreglu- og tollstjórann á Suðurnesjum og yfirstjórn embættisins. ,,Vonum við að hægt verði að finna farsæla lausn á þessum alvarlega vanda með hag Suðurnesjabúa og flugfarþega í huga sem þegar búa við skerta þjónustu."

Stjórn Lögreglufélags Suðurnesja hyggst halda fund um málið í Duus-húsum í Reykjanesbæ á morgun en hann er öllum opinn og hefst klukkan 20.