Tveir Litháanna sýknaðir af árás á lögreglu

Tveir af Litháunum þremur sem ákærðir voru fyrir að ráðast á lögreglumenn við skyldustörf í miðborg Reykjavíkur í janúar hafa verið sýknaðir af ákæru í Héraðsdómi Reykjavíkur þar sem ekki þótti komin fram lögfull sönnun fyrir aðild þeirra að árásinni. Þriðji maðurinn var hins vegar dæmdur í 60 daga fangelsi fyrir að slegið tvo lögreglumenn í andlitið.

Atvikið átti sér stað fyrir framan veitingastaðinn Monte Carlo á Laugaveginum en þar voru fjórir óeinkennisklæddir lögreglumenn við fíkniefnaeftirlit. Þar höfðu þeir afskipti af tveimur körlum og einnig konu þegar mennirnir þrír komu aðvífandi í tveimur bílum og túlkaði einn árásarmannanna það svo að verið væri að ráðast á konuna. Ráðist var á lögreglumennina og voru tveir þeirra fluttir á sjúkrahús vegna áverka, þar af annar með heilahristing. Fimm menn voru upphaflega handteknir í tengslum við málið en tveir þeirra voru ekki ákærðir.

Í ákæru var einum gefið að sök að hafa slegið tvo lögregluþjóna í andlitið og var hann sakfelldur fyrir það út frá framburði lögreglumanna.

Þremenningarnir voru svo í sameiningu ákærðir fyrir að ráðist á þriðja lögregluþjóninn og slegið hann ítrekað í höfuðið og sparkað í hausinn á honumþannig að hann hlaut meðal annars heilahristing.

Neituðu þeir sakargiftum og voru þeir sýknaðir þar sem hvorki lögreglumaðurinn né önnur vitni á vettvangi gátu borið um það hverjir það voru sem réðust á lögreglumanninn. Ákærðu hefðu verið á vettvangi en þar hefðu einnig verið tveir félagar þeirra sem ekki voru ákærðir. Því taldi dómurinn ekki komna fram lögfulla sönnun fyrir sekt þeirra varðandi hina heiftarlegu árás.